Mestieri de na volta e de adeso



Tuti de na serta età savemo quel che xé avendo da 50 ani a sta parte e del cambiamento epocae che in cusì poco tempo se ga determinà nei nostri paesi. I tosi zòvani pensa ch'el mondo sia sempre stato come che i o vede deso coe machine che core dapartuto e che fa tuto. Mai nea storia dea unamità xé sucùsa na rivoeusion de sto genere da quando xé scomparsi i dinosauri daea fàcia dea tera, ma noaltri aeora no ghe gèrimi. Fin a 50 anni fa el motor del vivare gera prinsipalmente l'agricoltura e l'umanità fin aeora gera sopravisua grasie aea coltivasion dea tera parchè se no se produse no se magna e se no se magna no se pol far altro, gnanca procrear. Adeso l'agricoltura a xé deventada na cenerentoea sorpasada daea industria, dal comercio e dai servisi ma gavemo visto ultimamente che coea muca pazza a xé drio torse qualche rivincita. Eco che serve confrontar un poco el prima e el deso per capir dove n'demo finir. L'agricoltor che ora el se ciama giustamente imprenditor agricoeo, el ga ben poco da védar co queo de 50 ani fà. Nol xé pì el contadin tradisionae ma el se ga speciaisà anca lu: o el fa l'alevator, o l'ortoean, o el produse soeo fruta, ua o cereai che aea fine vende a qualche industria che lavora sti prodoti e i mete in vendita. Adeso gavemo alevamenti anca co mie e passa capi o sentomie gaìne e industrie co na produsion de meiari de etoitri de vin, o toneate de mangimi. Tuto questo na volta no esistea parchè tuto gera raportà ai bisogni dea fameja che produsea: fromento par farse el pan in casa, soturco par a poenta, ua par el vin, erba par el forajo, vache par el late e par far un poco de buro e formajo, i boi par el lavoro e dopo, el porseo par i saeadi, gažne par i ovi, cunìci, fruta de stajon sui campi, l'orto par e verdure, legna par a cusina. Soeo queo che ghe gera in pì se vendea
par comprar a roba che mancava: oio, sae, medisine, e qualche volta scarpe, vestiti e poco altro. I omani gavea i so compiti: aràr, solcàr, semenàr, falsàr, tendare ea staea e in genere i lavori pì pesanti mentre e done se ocupava generalmente dea casa e dei lavori de pasiensa. Anca i tosati coi scomisiava a ésar scavesòti oltre che saltar i fossi par longo, i dovea far a so parte. Naturalmente no esistendo e machine, tuto gera fato a man e servia tante persone che a seconda dea stajon e dei lavori da fare e se jutava. El mondo gera tuto là torno casa, nei campi e nea contrada dove se conosea ogni particoeare: e torne, vaneda par vaneda, e caveagne, i cavini, i fossi, e siese, i alberi, i confini. Na volta aea domenega i andava in paese aea Messa e dopo i
pasàva qualche ora in ostaria par far quatro ciacoe coi paesani e sentir e novità. Chi gavéa poca tera e magari distante ai Runchi o al Brenton i se rangiava col careto e musso mentre e fameje pì grande come i Osti, i Biasi, i Piaséta, i Piòti, i Etri, i Pastèga, i Fogài, i Séchi, i Parisoti, i Bonasèi, i Batistèa, i Mèneghi, i Canìe, i Seràntoa, i gavéa da rente casa a tera da lavorar e tuto gera in funsion par far i mestieri al mejo. El fabricato gera par esperiensa struturà in modo de ciàpar al masimo el fresco de l'istà e el soe d'inverno, come e case tradisionai venete impiantae da nord a sud in modo che ghe fosse sempre a circoeasion de l'aria. A cusina col fogoearo se trovava naturalmente a tramontana e e camere posibilmente a mesodž. In alto el granaro gavea
bei balconi par poder secàr el gran e a caneva par ésar fresca a dovea aver i bocaroi al posterno e a matina. In fianco e a mesodì ghe gera el portego grando a pì archi parchè el servia a tanti usi: ricoverar i cari col forajo, métar el tinaso in autuno par far el vin, scarfoiar el soturco, cantando e ciacoeando fora dal soe o daea piova e far calcosa riparai dal fredo anca d' inverno. In pì soto ogni portego che se rispetava no mancava un quadreto dea Madona davanti aea quae i disea aea sera el rosario. Davanti ghe gera na corte granda con in fianco na bea besoeara o un bel olmo che fasea ombra d'istà e dove zogava i tusi, e da drio, a staea dee bestie co a teda in sima, comoda par tirar el fen. In fondo daea parte oposta se metéa el casòn coe staeote dei porsei, el pùnaro dee
gaìne, e caponare dei cunìci e el leamaro. El posso de l'acqua el se trovava de soìto nea crosàra dea contrada, dove e fémene se trovava ben voentieri par ciacoear un poco. El contadin a chel' tempo el dovea rangiàrse a far de tuto oltre che a coltivar a campagna. A l'ocorensa el fasea el marangòn o favaro par riparar i atresi, veterinario par conoscer e bestie, el gera meteorologo o botanico par saver quando aràr, semenàr, bruscàr, butàr el leame nel posto e nel tempo par aver a masima resa, chimico quando el dovea tegnér de ocio el mosto de ua ch'el bojsse nel modo dovùo. El fasea anca tanti lavori che adesso i fa i speciaisti in camise bianco: far el pan, far el buro e el formajo, far su el porseo, conservar tanti prodoti d'istà par l'inverno. Par gnente se disea: saver de contadin, scarpe grose, servèo fin. Ma nonostante tuto sto lavoro che no asàva spasio ad altro, a vita gera grama parchè mancando l'atuae tipo de lavorasion, a produsion gera bassa e capitava spesso a tempesta o l'arso a sbasàrla ancora. In pì a tera che i lavorava, tante volte no a gera de proprietà e i dovea dividere chel' poco coi paroni e pagar e decime.
Par questo nesun podea permeterse ecèsi e tuto vegnea rancurà. In montagna i falsava l'erba anca in meso ae crode e nel bosco no restava par tera un steco o na foja seca parchè tuto servia e soto e piante gera lustro, diversamente da deso che no se pol gnanca caminare. Na vanèda, un poca de erba, queo che deso se buta via, par chi gavéa poca tera, gera considerà question de sopravivensa e naturalmente dava motivo a barùfe: a guèra dei puarèti. Par questo tanti se jutava co altri mestieri o i xé emigrai all'estero. Quando ghe gera da véndare o comprare qualche bestia el contadin che generalmente no frequentava tanto i marcai, se afidava a un negosiante o mediator de fiducia che gera al corente dee ocasion e dei prèsi. Ricordo che in zona ghe gera i Barichei negozianti de bestie e i Santini che i fasea i mediatori mentre i Tabaconi negosiava co fruta de stajon ( pumi, piri, nose, castagne ) e tuti se tramandava el mestier de pare in fioeo, quasi a fosse na istitusion. I partìa aea note col cavaeo, careto e lanterna, in bicicleta o anca a pìe, istà o inverno, par èsar presto al marcà seguendo el deto: chi prima arriva mejo alogia. Sicome ogni dì o so na sità o n'antra se tegnéa marcà, ogni note se sentìa pae strade cavai e careti che pasàva o zente che parava e bestie. Al marcà ogni negosiante o mediator se o conosceva par el camisoto, el fasoeto al coeo e a bagoìna.
I girava torno ae bestie, i e vardava in boca e nei oci se e gera sane, i e palpava nei posti giusti e aea fine i ghe dava un prèso. Dopo scomisiava a tratativa e osando, tirando i brasi e anca qualche mocoeo, i sercava de combinar co na batùa de man e, se tuto andava par el mejo, i andava dopo in ostaria a berghe drio. Adeso sto marcà tradisionae xé finio parchè i prèsi se i trova ogni matina sol giornae e basta na teefonada par combinar l'afare e un camion par trasportar a merce. Fin a poco tempo fà qualche negoziante de fruta de stajon faséa ancora i marcai con angurie e meoni: i Sandrini, i Basciòcate, i Coeta, Bepi Casata.
Co lori ghe gera anca Onorio Tabacon che col so camieto gira de qua e gira de là, el conosea mèso mondo e tuti i bar. Sparii daea scena stì personagi xé rivai i supermercai dove te entri, te vardi, te compri a preso fisso con pagamento pronta cassa. Dopo i supermercai xé rivai anca i ipermercai che i gha proprio de tuto so chilometri de scansie anca angurie d'inverno, parchè superbilici frigoriferi i trasporta in tempi superapidi da un capo all'altro del mondo atraverso superstrade supertraficae tuti i prodoti che a moderna supertecnoeogia crea in continuasion come supercarni e superpolli alevài con supermangimi e superverdure ben tratàe, tuto par zente superesigente e superindafarada.
Naturalmente drio aea agricoltura e al comercio xé andà anca l'artigianato che un tempo a gera na miniera de conoscense e esperienze andae ormai perse. El picoeo artigian ch'el savea far un poco de tuto, un mobie, un atreso, riparar na porta, na seraura, un rubineto come gera Vigilio e Ampelio Mosca, Jacòna, Martin Borasca, Joanin Siro, Jijo Manase, Joani, Carlo e Moro Favaro, i Majari, no te i trovi gnanca a pagarli a peso d'oro. Tuti deso xè speciaisai so na roba, i riva fin là e basta e dopo te toca ciamàrghene n'antro e dopo n'antro ancora
par finire e ringrasiar Dio de trovarli. Dall' artigian speciaisà xé nata a fabrica speciaisada a far un soeo prodoto moltiplicà all' infinito. Dentro enormi capanoni anonimi, in stie moderno tuto cemento e véro, dove tuto xé in funsion aea soea produsion, chi lavora, magari coea luce artificiae e aria condisionada, no sa quasi se fora xé dì o note, istà o inverno. Sto modo de lavorar ripetitivo porta a lungo andar aea alienasion dea persona e condisiona a vita dea zénte parchè pur non mancando el lavoro e el reativo benessere, manca a sodisfasion de fare calcòsa de personae. In pì a produsion de massa ga portà a un sachegio del teritorio che zontà ai trattamenti agricoli ga procurà un inquinamento ireversibie e dani futuri incalcoeabii. Diverse gera e vèce botéghe artigianai dove magari in mèso aea confusion, ogni picoea roba gavea a so importansa e l'artigian gera considerà quasi un artista. Anca fora dee fabriche o dei ufici tuto se svolge come predisposto da altri che nesùn conose ma che tramite a publicità e a teevision furbescamente i condisiona e nostre selte e el nostro modo de vivare. Tante volte compremo soeo robe superflue che dopo poco butemo via come no e gavesse nesun vaeor. Ma comprando continuamente robe par butarle via senza afesionarse xè come canceare anca i sentimenti. Aeora se podarìa dir: Stàmoi mejo quando stàmoi pèso? El punto xé de sercàr de aver el mejo sensa distrugere queo che gavémo. No sarìa ora, tanto par dir qualcosa, che so sta corsa se fermassimo un poco par tirar el fià!

copyright Venetoimage