Impressioni sull'altro Veneto nel Rio Grande do Sul (Brasile)
Rivando a Porto Alegre, capitae del Rio Grande do Sul Brasie, se ga l'impresion de aver sbalià destinasion. Si, se vede e palme e na vegetasion tipica del Brasie, ma el primo
colpo de ocio te dise de trovarte quasi dae nostre parte. Longo a strada se vede come da noaltri, tante casete e fabrichete co nomi nostrani che e produse de tuto: mobii, acesori par a casa, lavori de carpenteria etc. e questo te da a sensasion de essere ancora nel nostro Veneto, non de aver traversà quasi par longo l'Oceano Atlantico. Pì in su nea serra, in mèzo a foreste co alberi mai visti prima, i nomi de qualche paese o sità come Garibaldi, Nova Padova, Nova Bassano, i te dise che te pol fermarte e domandare: Bondì, par piasèr par andar aea festa dea ua par dove se va? E quei te risponde in scèto diaeto: Feste dea ua ghe né dapartuto ma a pì granda a xé a Caxias. E a Caxias a festa xé davero granda parché a dura ben 15 dì e se vede de tuto: mostra dea ua apena vendemada e del vin de l'ano pasà, dea graspa,
dei saeadi, del formajo, dea poenta e fiera dea agricoltura, dea produsion artigianae e industriae. No manca naturalmente i spetacoi, e sfiate e a musica regionae gaùcha, italiana e veneta. Come xé avenuo nel Centro del Brasie dove a musica africana ga originà el samba e nel Nordeste dove a musica lusitana ga creà el forrò e a musica sertanesa, nel Sudeste, specie nel Rio Grande do Sul, xé nato el canto gaùcho de derivasion iberica che el xé esensialmente un canto a vose singoea compagnà daea chitara o fisarmonica. So sto contesto se ga zontà pì tardi i canti dei nostri coloni con canson in magioransa venete e trentine, a pì vose, acompagnae ae volte daea fisarmonica. I xé do generi difarenti ma a pasìon e a fantasia ae volte i ga combinai con un risultato piacevoe e vivace. L'esempio lo da el cantautor Valmor
Marasca che compagnà daea so fisarmonica, canta canson tipiche dea tradision veneta co tochi de ritmo gaùcho con bon suceso. Xé veramente sorprendente e un piasèr andar par i paeseti poiai in sima al Rio das Antas e sentir parlar el nostro bel diaeto a pì de 10.000 chiometri de distansa da zente rivai qua pì de 100 anni fà e che ancora i se gode de zugar ae bae, aea mora, a scarabocio e tresete. Vardandose adeso intorno, tra e palme e e grande araucarie xé piantai vignai, pomari, persegari e orti. Nee sità pì grande co bee vie e negosi all' europea se incontra cése con opere d'arte de vaeor (S. Pelegrino a Caxias) e nei dintorni, fabriche tra e pì importanti del Brasie. No se pol credare che i primi rivai co femane e putei, i gavea trovà soeo foresta vergine sensa strade e paesi e i dovea dormir in capane de frasche o adiritura sora i albari par difenderse dae bestie salvadegne.
Prima de disboscar e coltivar quea che gèra na foresta impenetrabie e par de pì in montagna, parché i portognesi e i tedeschi rivai prima i se gavea ciapà e tère pì bone in pianura, par sopravivere i ga dovesto contentarse dea rasìon de riso e fasoi pasada dal governo e dopo rangiarse co i pinoi dee araucarie e con un poca de cacia e pesca. A cansòn Mèrica, Mèrica dà nee paroe a realtà de quei tempi. Adeso i xé fieri de queo che i ga fato
arché lavorando duro sensa tante ciacoe e piagnistei, i ga strasformà asieme a altri emigrai quee tère ( Rio Grande do Sul, Paranà, Santa Catarina) nea region pì rica e dinamica del Brasie a parte a megaeopoi de San Paolo che xé un caso a parte. Vien da far el paragon co el nostro Nordest, 50 ani fa una dee region pì aretrae che tirandose su e maneghe e lavorando fìso, el xé pasà nei primi posti. In pì, là i xé riusii a mantegner vive e tradision che diversi grupi culturai quai i Miseri Coloni ripropone con entusiasmo anca da noaltri, dove invese na vioenta industrialisasion ne ga fato desmentegare tante robe e par questo adeso dovemo andarle a ripescare là. D'inverno, quando anca là vien fredo e neve, a unica in Brasie, i costuma ancora par
scaldarse tor un bicèr de vin caldo e aea matina in colonia, a casa de campagna, i fa marenda con pan, saeame e un goto de vin come ai veci tempi quando se se alzava presto par lavorar. Ma pur lavorando duro a montagna no pol dar pì de tanto. Par fortuna el Brasie xé grando e tanti xé andai verso el Mato Groso o altre region dove a tèra xé piana e se pol coltivar de tuto: praticamente i ga scomisià de novo sempre coea determinasion e l'entusiasmo che i carateriza. Oltre a éser orgogliosi del proprio lavoro i o xé anca par aver portà nel Novo Mondo e nostre tradision e quea fiosofia de vita distiada da secoi de storia e esperiensa contadina che compagnando in giusta misura lavoro e gusto dea vita, porta a na società abastansa equiibrada e vivibie.
Par dirla co qualche nostro e sempre vaìdo proverbio:



- Chi no vol far fadìghe, el teren ghe produse ortìghe.


- Chi cade in povertà e in poverela, perde l'amigo e anche la parentela.


- Co la fame vien dentro la porta, l'amor va fora dai balconi.


- Pan, vin, sopresa e compagnia su nel bosco fa alegria.

Tuto questo xé un bel esempio de na emigrasion che pur ben integrada nea Nasion Brasiliana, no ga perso el coegamento coe so raìse. Par questo ben ga fato a Region del Veneto a fare un gemelagio col Rio Grande do Sul che vol ésar un segnae anca par e altre Comunità Italiane nel mondo.

copyright Venetoimage
S. Tabacon