Tempi moderni

El computer

Al mondo, dopo l’invension de l’omo
vien quea del computer
parché moltiplicando el so servéo
fa robe ecessionai anca un putéo.
Ma.. ghe se sempre un ma,
se l’omo, che so ch’el scherméto
ghe fa star tuto el mondo streto,
el se desmentega de queo vissin de lù,
pì che un guadagno, el ga perso de più.

A Tivù

A tivù xe na bea invenssion,
soeo strucando un boton
so tuto el mondo
se verze un finestron.

No ghe xe fato in tera
ch’el possa stare sconto,
pensa a tivù
fare un resoconto.

Sentà sol divano
te vedi sacro e profano
e nel to saeòto
te entra anca el quarantoto.

Se te si drio parlare
de na roba toa,
apare un personajo
che vol sire a soa.

Se te si coi parenti,
sensa tanti complimenti,
se presenta un tissio
che se mete tra i presenti.

Se un dì te si contento
parché e cose va col vento,
non impissare a tivù
parché no te canti più.

A tivù contenta tuti:
i putéi ga i cartoni,
e done i senegiati,
i omani el baeon
e par i veci na benedission.

Ghe xe quei dea poitica
che i scalda el minestron,
i lo mostra in giro
ma i se lo cuca de scondòn.

De domenega tanto sport,
no se magna altro,
el xe un piato preparà
soeo par l’apassionà.

Quando riva el quiz
tuti risponde in coro
e co apare e baerine
xe come nee festine.

Dopo vien a publicità
che mostra robe bee,
indossae dae modee
par persone grasse e cee.

Ma voendo tuti insieme
vardare la tivù,
sucede un finimondo,
ogni un siga de più.

Quando riva quel che piaze
tempo non ghe nè più,
te vardi l’ora tarda
e te sari la tivù.

Finalmente vien a paze
a fameja xe tranquìa,
xe finii i reclami
par vardare i programi.

Chi dixe a xe istrutiva
chi na perdita de tempo,
xe soeo na quisquilia,
parché a xe ormai dea familia

El Teefono

El teefono xe l’atresso
che te fa parlare a distansa
ma el se comporta
sensa un poca de creansa.

Come un paron de casa,
nol vol spetàre
come tuti i altri
el so turno de parlare.

Se ti si drio ciacoeare
o far un ragionamento,
col s’intromete lù
el deventa un tormento.

Ma se ghe xe da dire
na roba ben urgente,
el fa un bon servissio,
el fa feìse a zente.

Mari e monti el traversa
sensa esitassion,
e ti comodo in casa
te fe el to figuron.

I so fioi pi cei
se ciama teefonini,
a xe na nova invension
quasi un zogo par bambini.

Adesso i xe de moda
parchè ghe xe a preferensa
de parlare ai altri
soeo coea frequensa.

Te vidi tanti in machina,
in publico o in strada
che i parla a voxe alta
coea testa tuta piegada.

E i fa savère
i so afàri aea zente
anca a chi
no gh’interessa gnente.

Ma pur co tuti
sti mezi de comunicassion
al mondo ghe xe ancora
tanta incompression.

Eco che xe ben
almanco qualche volta
trovarse a quatro oci
e parlarse come na volta.

A Machina

E strade dei terrestri
xe ormai ciapàe,
da milioni de machine
che le ga ocupae.

A machina xe
na bea invension,
ma par un mainteso
ghe ne na invasion.

A xe par tuti
proprio un gran vantagio,
ma co sta invasion
l’omo xe un ostagio.

A xe na cosa sovrumana,
te strucchi i pedai,
a te porta dapartuto
e no a se stufa mai.

Ormai de ea
no se pol star sensa,
parché de caminare
no gavémo pi pasiensa.

A xe deventada
a nostra fedee amica,
ma basta na disatension
e a te xe nemica.

Insima aea machina
semo dei campioni,
ma se a ne scampa
passemo da sempioni.

Se a vien da destra
ghe demo a precedenza,
se a xe de fronte
ghe femo a riverenza.

A fa tremare i veci
a spaventa i putei,
se a ne taja a strada
ne vien i convulsei.

Co la incontremo
a tira via de bruto,
no a da confidenza
e gnanca un saeuto.

Se a fa l’aria onta
non importa gnente,
anca un incidente
no impressiona pi a zente.

Se pò par strada
te incontri un camiòn,
prega el Signor
de scampar da quel bestion.

Se a machina ancò
xe tratada mejo dea zente,
xe parchè mancando ea
no se fa pi gnente.

Se un tea sfiora un poco
te vien suìto loco,
e par un bon parchegio
te pol far un sachegio.

Se te si coea morosa
e ne passa una de bea,
te assi là la tosa
e te vardi quea.

Xe vero che a beve massa
e che a suga el fondo,
ma ormai a xe ea
a parona del mondo

El Supermercato

Xe passà i tempi magri
dea botega col gatéo,
ch’el spetava in basso
na stricheta de buéo.

Tra i banchi del supermercato
no te vedi pì el gato,
parchè adesso a puisìa
a xe da farmacia.

Co te si là dentro
a par na gran bobana,
el xe el negossio novo
sistemà all’americana.

Coi scafài ben strapieni
de quel che xe pi beo,
a zente fa presto
a impienàr el caréo.

Co na fia che no finisse
là te trovi el ben de Dio,
tuti vol passàr davanti
e nessun star da drio.

A roba xe tuta là,
tuta quanta a bon marcà,
par che no a coste gnente
soeo par far feisse a zente.
Chi passa par dileto
soeo par far un gireto,
se ghe xe na promossiòn
volentieri el fa un strapèto.

Co i punti che se ciapa
i promete un gran vantajo,
i regàea aea fin
na fetina de formajo.

Ma co se riva in cassa
col carèo ben fornio,
no te pol pì fare
e lacrime de cocodrio.

Bisogna roversare
tute quante e scarsee
e se manca un euro
se ne sente dee bee.

L’importante xe comprare
e andar via contenti,
parchè se fa sempre tempo
fare i penitenti.

S. Tabacon