A STORIA DEA POENTA

Savemo tuti che el mais deto qua da noaltri soturco el xe rivà dae Americhe nel 1500 e che nel nostro Veneto e nea pianura Padana el ga avuo na gran diffusion tanto che daea metà del 1800 e fin a metà del 1900 nee zone pì povere el gavéa sostituìo el frumento.
Tanto a poenta jera entrada nea vita quotidiana de alora che ghe gera sta dedicà oltre a tanti deti
anca na canson che i nostri emigranti ga portà in Brasie e adesso a xe stada riportada qua:

A canson dea poeanta.

-Quando se pianta la bela polenta, la bela polenta se pianta cussì (imitando el gesto de piantar i grani se acompagnava)… oh, oh, oh, bela polenta cussì, ciaciapùn, ciaciapùn, ciaciapùn, ciaciapùn.
-Quando se cresse la bela polenta, la bela polenta se cresse cussì, se pianta cussì, se cresse cussì….
-Quando se fiora la bela polenta, la bela polenta se fiora cussì, se pianta cussì, se cresse cussì,
se fiora cussì.
-Quando se coglie la bela polenta, la bela polentase coglie cussì, se pianta cussì, se cresse cussì,
se fiora cussì, se coglie cussì.
-Quando se maséna la bela polenta, la bela polenta se maséna cussì, se pianta cussì, se cresse cussì, se fiora cussì, se coglie cussì, se maséna cussì …
-Quando se còse la bela polenta, la bela polenta se còse cussì, se pianta cussì,se cresse cussì,se fiora cussì, se coglie cussì, se maséna cussì, se còse cussì…
-Quando se taja la bela polenta, la bela polenta se taja cussì,se pianta cussì,se cresse cussì, se fiora cussì, se coglie cussì,se maséna cussì,se còse cussì, se taja cussì…
- Quando se magna la bela polenta, la bela polenta se magna cussì,se pianta cussì, se cresse cussì, se fiora cussì,se coglie cussì,se maséna cussì, se còse cussì,se taja cussì, se magna cussì….
-Quando se scor…za la bela polenta, la bela polenta se scor…ra cussì, se pianta cussì, se cresse cussì, se fiora cussì,se coglie cussì,se maséna cussì,se còse cussì, se taja cussì, se magna cussì, se scor…
za cussì…oh,oh,oh, bela polenta cussì, ciaciapùn, ciaciapùn, ciaciapùn, ciaciapùn.

Sta cansòn riporta allegramente tuti i momenti dea vita dea poenta che nea realtà gera fadigosi:
Se scomissiava in Aprie coa tera gera un po’ scaldada parchè el soturco a xé na pianta proveniente dae zone tropicai de l’America e a ama el caldo. Dopo na bona coltada co leame de casa, se arava a ch’el tempo coi boi e drio, nea vaneda bona, e done con un sacheto de grani e na sapéta a man, svelte piantava el soturco. Dopo spuntà, col gera un poco cressùo( 20 -25 cm) bisognava sciàrarlo quando e gambe gera dòpie, dopo rabioàrlo par smoverghe a tera, sapàrlo par eliminar e erbe
(gramegna,sbroeja,ajon) e darghe forsa (i diséa: ogni sapada na coltada), infin se passava tra e fie coea solcaroea par darghe tera e un poca de sae (urea). Dopo serca un mese quando a pianta ormai granda scomissiava a far a crozéta e segnar a panocia, bisognava starghe drio co l’acqua parchè a se formasse ben. Quando a panocia gera compìa, a pianta scomissiava a secarse e verso a fine de settembre e i primi de otobre , quando i primi venteséi de autunno i faséa mormorar e foje seche del soturco, a vegnéa tajada una a una col mesoréto. E piante de soturco tajae e restava ancora sol campo pontae soe piantàe o in casée par secarle ben e pì tardi con un caro e gera portae soto el portego de casa dove ogni sera tuta a fameja, anca i visini dava na man, par scarfojarle, fasendo fiò, ciacoeando,cantando e bevendo a bìcia (vin fato coe serpe de l’ua za foeada).
Dopo coe seste se portava man man e panoce sol granaro verto parché e ciapàsse aria e no e fasesse a muffa, mentre coe scartosse fine se fea sporte e borse e con quee grosse i paìoni dei leti (i antenati dei materassi: quante copie de sposini ancora 50-60 anni fa’ ga fato a so luna de miee sol pajon de scartosse!). Anca el resto dea pianta seca del soturco vegnea utiizada: i scataroni (parte terminae coe raise) e i bòtoi (a panocia sensa grani) servìa a far fogo, el resto dee cane coe foje par far el leto ae bestie in staea o anca insembrarle col forajo sol pasto. De quando in quando, un poche aea volta, se portava e panoce al muin par masenarle e se portava casa a farina fresca bona par a poenta, ma bisognava far atensìon de méterla so un posto suto e tamisarla prima de dopararla. A poenta a ch’el tempo se faséa so a caliera de rame tacada a na caena che pendéa dal camin del fogoearo (larin) o so a cusina economica cavando i serci , butando zo a farina pian pian so l’acqua boente e saeada e mescolando continuamente parché no a fasesse i grumi. Dopo pì de meza ora quando a poenta scomissiava a destacarse daea caliera, gera ora de sartarla sol tajer de legno dove se doparava un spagheto fin par far e fete che tuti spetava sentai in toea. Par i tosati ghe gera un piato particolare: nea caliera dove gera restae e groste calde dea poenta apena sartada, se metéa el late fredo e con un sculier chi pi gratava pi magnava. El dì drio a poeanta vansada ormai freda, messa a brustoear sora i feri dea cusina economica o sora dee bronse e a gera un bocòn speciae col saeado fresco, formajo,figheti, scopeton (renga) anca parché no ghe gera altro! Purtroppo l’uso quasi esclusivo dea poeanta che gera el piato dei pì poareti, ga portà specialmente nell’ 800 aea grave maeatia dea peagra (mancansa de vitamine) che provocava gravi disfunsion del corpo.
Tanti gera i piati compagnai daea poenta: poenta e tocio de gaéto, poenta e bacaeà, poenta e moeche
(adesso un lusso), poenta e bisata in umido, poenta e sépe in umido, poenta e osei e osei scampài, poenta e sopressa o saeado brustoeà, poenta e museto, poenta, radici e uvi duri, poenta e formajo picantin, poenta e late, poenta e funghi, poenta e gévaro in salmì, poenta e cunìcio in umido, poenta e renga, poenta taragna, etc.

Par questo nea tradission el ricordo dea poenta xe restà in tanti deti popoeari:
-a chi no ghe piase a poenta el Signor ghe toe anca el pan.
-chi dopo a poenta beve acqua, alsa na gamba e a poenta scampa.
-do poente insieme no se ga mai viste.
-poenta e late scalda e cujate.
-poenta e puìna pì se core manco se camina.
-poenta nova e osei de riva,vin de grota e zente viva.
-poenta freda no fa carità.
- a far a poenta ghe vol onto de gùmio.
-quando se ga fame a poenta pare saeame.
-a poenta xe na siora, chi la vede s’inamora,chi la magna se sostien, benedeta a poenta.
-a poenta xe bona par quatro robe: a serve da menestra, a serve da pan,
a te impiena e a te scalda e man.
- xé mejo poenta in casa soa che el rosto in casa dei altri
- e par finir, xé mezzogiorno, a poenta va torno, i frati se senta, eviva a poenta.

Questa xé a storia dea poenta de altri tempi, adesso coea mecanisassion xé tuta n’antra storia.

 


Aprie, el sòturco xe pena spuntà


Ora de sciaràrlo e solcarlo
 


Ora dea fioritura


Setembre-el xé ormai seco

 


Xe ora de tajarlo


El soturco soto el portego par descarfojarlo

 


Descarfojare


Se sgrana e panoce

 


Al muin


A poenta soea caliera

 


Na bea poeta bianca sartàda sol tajer


Un bon piato invernae: poenta,radici,funghi e muséto

 


Poenta brustoeada


Sporte coe scartose

 


El leto col pajon de scartosse


I scatàroni e e casée vode resta sol campo